iPad Pro ឆ្នាំ 2020 ភ្ជាប់មកជាមួយជម្រើស RAM 6GB គ្រប់ម៉ូឌែលទាំងអស់

ប្រិយមិត្តមួយចំនួន ប្រហែលជាបានដឹងហើយថា ស្ងាត់ៗកាលពីយប់មិញនេះ តាមរយៈគេហទំព័រផ្លូវការរបស់ខ្លួន ក្រុមហ៊ុន Apple បានធ្វើការប្រកាសចេញ iPad Pro ជំនាន់ថ្មី ឆ្នាំ 2020 ជាផ្លូវការ។ ថេប្លេតលំដាប់កំពូលជំនាន់ថ្មីចុងក្រោយ របស់ក្រុមហ៊ុន Apple បានបំពាក់មកជាមួយបន្ទះឈីបលំដាប់កំពូលជំនាន់ថ្មី, កាមេរ៉ាថ្មី ក៏ដូចជាអាចគាំទ្រក្តារចុចជំនាន់ថ្មី Magic Keyboard ដែលមានភ្ជាប់មកជាមួយភ្លើង Backlit និង Trackpad ជាដើម។

Loading...

ទាក់ទងទៅនឹង iPad Pro ជំនាន់ថ្មី នេះដែរ នៅលើគេហទំព័រផ្លូវការរបស់ក្រុមហ៊ុន Apple មិនបានបញ្ជាក់ឲ្យយើងបានដឹងទេថា តើ iPad Pro ឆ្នាំ 2020 នេះ ភ្ជាប់មកជាមួយជម្រើស RAM ទំហំប៉ុន្មាន GB នោះទេ? ប៉ុន្តែបើផ្អែកទៅតាមកូដ ដែលអ្នកអភិវឌ្ឍន៍កម្មវិធីបានរកឃើញ នៅក្នុងប្រព័ន្ធប្រតិបត្តិការ iOS 13.4 (GSM) បានបញ្ជាក់ឲ្យយើងដឹងយ៉ាងច្បាស់ថា iPad Pro ឆ្នាំ 2020 បានភ្ជាប់មកជាមួយជម្រើស RAM ទំហំ 6GB គ្រប់ម៉ូឌែលទាំងអស់។ ខណៈដែល iPad Pro  ដែលបានប្រកាសចេញកាលពី ខែតុលា ឆ្នាំ 2018 កន្លងទៅ មានតែម៉ូឌែល ដែលមានអង្គផ្ទុកទិន្នន័យទំហំ 1TB ប៉ុណ្ណោះ ទើបភ្ជាប់មកជាមួយជម្រើសជាមួយ RAM ទំហំ 6GB ចំណែកឯ ម៉ូឌែល ដែលមានអង្គផ្ទុកទិន្នន័យ 64/256/512GB ភ្ជាប់មកជាមួយ RAM ត្រឹម 4GB តែប៉ុណ្ណោះ។ បន្ថែមពីនេះទៅទៀត តាមរយៈកូដ ដែលគេបានរកឃើញ នៅក្នុងប្រព័ន្ធប្រតិបត្តិការ iOS 13.4 (GSM) ក៏បានបង្ហាញឲ្យយើងដឹងថា iPad Pro ឆ្នាំ 2020 ក៏បានភ្ជាប់មកជាមួយបន្ទះឈីប Ultra Wideband U1 ដូចទៅនឹង iPhone 11 Series ផងដែរ។

គួររំលឹកផងថា iPad Pro ឆ្នាំ 2020 កើតមកជាមួយជម្រើសទំហំអេក្រង់ចំនួន 2 គឺ iPad Pro 11 អ៊ីញ និង iPad Pro 12.9 អ៊ីញ មានបន្ទះបង្ហាញជាប្រភេទ Liquid Retina ជាមួយអេក្រង់ Refresh Rate 120Hz (ProMotion) អាចគាំទ្របច្ចេកវិទ្យា True Tone និងកម្រិតទឹកពណ៌ P3 ផងដែរ។ ចំពោះកម្លាំងម៉ាស៊ីន iPad Pro ជំនាន់ថ្មី ឆ្នាំ 2020 បំពាក់មកជាមួយបន្ទះឈីបលំដាប់កំពូល A12Z Bionic មាន Cores សរុបរហូតដល់ទៅ 8 គ្រាប់ អមមកជាមួយ GPU ដែលមានដំណើរកាន់តែប្រសើរជាងមុន ក៏ដូចជាមកជាមួយជម្រើសអង្គផ្ទុកទិន្ន័យទំហំ 128/256/512GB និង 1TB។ ចំណែកឯផ្នែកកាមេរ៉ាវិញ iPad Pro ជំនាន់ថ្មី ឆ្នាំ 2020 ភ្ជាប់មកជាមួយកាមេរ៉ាក្រោយចំនួន 2 គ្រាប់ ដោយមួយគ្រាប់គឺជាលេនគោល មានទំហំ 12MP និងមួយគ្រាប់ទៀតជាលេនទូលាយ (Ultra Wide) មានទំហំ 10MP គួបផ្សំជាមួយសេនស័រ LiDAR ប្រើសម្រាប់គណនាជម្រៅរបស់វត្ថុ ផងដែរ៕

ប្រភព៖ Cambo-Report

Loading...